पिंपरी । निर्भीडसत्ता न्यूज
पिंपरी चिंचवड महापालिकेच्या वतीने महिला बचत गटांना व्यासपीठ उपलब्ध करून देण्याच्या उद्देशाने पवनाथडी जत्रेचे आयोजन करण्यात आले आहे. हा उपक्रम २५ फेब्रुवारी ते १ मार्च या कालावधीत आयोजित करण्यात आला आहे. जत्रेचे उद्घाटन २५ फेब्रुवारी २०२६ रोजी सकाळी १० वाजता महापौर रवि लांडगे यांच्या हस्ते होणार आहे.
महापालिकेच्या समाज विकास विभागाच्या वतीने सांगवी येथील पी.डब्ल्यू.डी. मैदानावर आयोजित या उपक्रमात नागरिकांना खरेदीसोबतच विविध सांस्कृतिक कार्यक्रमांची मेजवानी अनुभवता येणार आहे. महिला बचत गटांनी तयार केलेल्या खाद्यपदार्थांचे तसेच विविध उपयुक्त वस्तूंचे स्वतंत्र स्टॉल्स येथे उभारण्यात आले असून, या माध्यमातून महिला उद्योजकतेला चालना मिळणार आहे. यासोबतच स्थानिक उत्पादनांना हक्काची बाजारपेठ उपलब्ध होणार आहे. या उपक्रमात महिला बचत गटांनी निर्मित केलेल्या विविध वस्तू, खाद्यपदार्थ आणि पारंपरिक हस्तकलेचे प्रदर्शन नागरिकांसाठी खुले राहणार आहे. शहरातील नागरिकांनी मोठ्या संख्येने उपस्थित राहून या उपक्रमाचा लाभ घ्यावा, असे आवाहन महापौर रवि लांडगे यांनी केले आहे.
या कार्यक्रमास विधानसभा उपाध्यक्ष अण्णा बनसोडे, खासदार श्रीरंग बारणे, डॉ. अमोल कोल्हे, आमदार उमा खापरे, अमित गोरखे, महेश लांडगे, शंकर जगताप, महाराष्ट्र राज्य अनुसूचित जाती-जमाती आयोगाचे सदस्य ॲड. गोरक्ष लोखंडे, महापालिका आयुक्त श्रावण हर्डीकर, उपमहापौर शर्मिला बाबर, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर तसेच, नगरसदस्य उपस्थित राहणार आहेत.
पवनाथडी जत्रेत होणारे सांस्कृतिक कार्यक्रम
(सर्व कार्यक्रम सायंकाळी ६ वाजता सुरु होणार आहेत.)
२५ फेब्रुवारी – ‘महाराष्ट्राची मराठी बाणा’
२६ फेब्रुवारी – सुप्रसिद्ध होम मिनिस्टर कार्यक्रम
२७ फेब्रुवारी – ऑर्केस्ट्रा म्युझिकल स्टार्स,
२८ फेब्रुवारी – ‘फोक संस्कृती’
१ मार्च – द फोक लावणी
