पिंपरी | निर्भीडसत्ता न्यूज
भारतीय जनता पार्टीचे कार्यकर्ते व माजी चिटणीस सचिन काळभोर यांनी उद्धव बाळासाहेब ठाकरे यांची मातोश्री येथे भेट घेतल्याने शहराच्या राजकीय वर्तुळात जोरदार चर्चा सुरू झाली आहे. खासगी कार्यक्रमाच्या निमंत्रणासाठी ही भेट झाल्याचे सांगितले जात असले, तरी या भेटीमागील राजकीय अर्थ काढले जात आहेत.
भोसरी विधानसभा मतदारसंघाचे आमदार महेश लांडगे आणि सचिन काळभोर यांच्यात गेल्या काही महिन्यांपासून वाद सुरू आहे. दोन महिन्यांपूर्वी झालेल्या निवडणुकीत काळभोर यांना भाजपकडून उमेदवारी देण्यास आमदार लांडगे यांनी कडाडून विरोध केला होता. त्यानंतरही दोघांमधील मतभेद वाढतच गेले.
दरम्यान, स्वीकृत नगरसेवक पदासाठी सचिन काळभोर यांनी भाजपच्या माध्यमातून अर्ज दाखल केला होता. मात्र, या नियुक्तीलाही आमदार महेश लांडगे यांनी विरोध दर्शविल्याने काळभोर यांच्या राजकीय वाटचालीत अडथळे निर्माण झाल्याचे चित्र दिसून आले.
याच पार्श्वभूमीवर काळभोर यांनी मातोश्रीवर जाऊन उद्धव ठाकरे यांची भेट घेतल्याने विविध तर्क-वितर्कांना उधाण आले आहे. शहरातील राजकीय जाणकारांच्या मते, ही केवळ औपचारिक भेट नसून भविष्यातील राजकीय समीकरणांची नांदी असू शकते.
पिंपरी चिंचवडमधील राजकीय वर्तुळात सध्या एकच चर्चा रंगली आहे—सचिन काळभोर लवकरच उद्धव ठाकरे यांच्या नेतृत्वाखालील शिवसेना (उद्धव बाळासाहेब ठाकरे) पक्षात प्रवेश करणार का? याबाबत अधिकृत घोषणा अद्याप झालेली नसली तरी, घडामोडींना वेग आल्याचे स्पष्ट दिसत आहे.
आगामी काळात या घडामोडींचा स्थानिक राजकारणावर मोठा परिणाम होण्याची शक्यता असून, भाजपसाठीही ही घटना धक्का मानली जात आहे. त्यामुळे येत्या काही दिवसांत पिंपरी चिंचवडच्या राजकीय पटावर मोठे बदल पाहायला मिळू शकतात.
